An ’n zieden droadke

In ’n Bans van zoaterdag steet ’n vertealsel oawer n’n deskeundigen dee zik ’n stuk of wat stroate in Eanske hef anzeen en doar hier en doar wal wat wil verbetteren.
D’r is oaweral wal wat better te maken mear mangs mu’j ’t doon met datgenne wat d’r is. As wieleu allemoal ’n betke dat korte lontje beteumigt dan löp ’t wal lös deank ik.

Mear heel wat aans. Biej de regering en ’n stuk of wat polletieke partiejen is d’r hommeles gangs. En dat keump d’r preenspoals op daal dat ze ’t nich meer met mekaar ensgezind bint. Benaamd biej de VVD heb ze ’t schoap an ’t drieten.
N’n bult van dee leu heb ’t nich met de moatregel dee ze heb ankunnigt um zowat alle boerenbedrieven met de boeren zölf an de kaante te zetten. En ik kan doar wal ’n groot stuk in met goan. Wiej wilt dee leu met heur mooie boerderiejen en al dee stukke groond, met van alns d’r op verbouwd, toch nich kwiet? Dat gef een groot gemis! Ai’j in de raandstad wont dan zu’j d’r nich zo völ van in de smiezen hebben mear veerders in ’t laand geneet iej toch van alns wat dee boeren henzet? Dat ze met heur wark en beeste wat rommel de locht in schikt dat zal best zo wean en doar könt ze völlicht wal wat an doon mear um ze noe allemoall an de kaant te zetten: nee, dat lik miej ginne gooden inval.

‘N’n optelsom woar hee zik meuilik oet kan lullen’

En ik deank, dat oons heerschop Rutte noch beheurlik in ’t oongemak keump. Met alns wat zik al aandertieds hef vuurdoan is ’t n’n optelsom woar hee zik meuilik oet kan lullen. Eerst dee onwoarheid sprekken oawer Pieter Omtzicht, too dee motie van ofkeurn, doarnoa dat opstappen, oonder zien zeggenschop, van ’t hele spul umdat ze zik met dee tooslagen affaire in ’n boek hadden betten.
En ok nog dee poedel dee ze begoan hebt in Grönningen met dee oetkering vuur de schaa dee de leu doar zollen kriegen. Al de leu wocht al joaren op datgenne woar as ze recht op hebt. En zo te heuren zal dat nog wal ’n zetke doeren, zolange zölfs dat disse regering d’r nich meer zit. En dan bint d’r meer as één miljoon hoeshoaldens dee eerdaags met de ceante in ’t ongemak keump. Loat ze zik doar ’s drok oawer maken en de boeren vuurlopig met röst loaten.

Zee zollen met de hele regering ’s doadwearkelik mutten helpen biej ’t ofwarken van dee kwesties. En ’t oawerige mear efkes opschoeven noar wat later. Rutte en Hoekstra en Kaag en Seegers en al dee aandere kopstukke mut an ’t weark biej de belasting en de oetkerings ofdeling in plaats van de bon vivant oet te hangen in Brussel, Straatsburg of Washington. En dan völ oaweruren maken um ’t allemoal zo rap mögelik vuur mekaar te kriegen en dan liekikgheid maken met de leu dee heur doar hen hebt zet.

Ik deank dat ’t pleatske van oonze premier an ’n zieden droadke hangt. ’t Zal miej niks wöndern dat hee vuurtiedig ziene biezen mut pakken. En mögelik bint d’r wal meer dee ’t vuur gezeen möt hoalden. Ofwochten mear!

Geneet van ‘n zommer.

Tinus Kroeds (reakties: t.kroeds@gmail.com)

Column Tinus Kroeds