Verbeuden!

Wat hef elkeen zik toch kaant hoalden an datgenne wat oons vroagt is. Duur den Koronakroam, dee zik alduur meer geet oetstreaien, is oons vroagt of wiej oons ’n betke in acht wilt hoalden met de feestdage.
Of wiej zovöl meuglik ’n moondkäpke wilt gebroeken, of wiej gin groote feestkes wilt hoalden en as wiej dat doot met nich meer as veer leu biej mekeaar in ’t hoes wilt kommen. En dat wiej zekers nich in n’n grote ruumte met heel völ leu biej mekaar komt en doar een feestke hoalt. Dat wiej oons, ok biej ’n grootgrutter, wilt hoalen an dee aanderhalve meter van mekaar of te blieven.
Ok is oons vroagt of wiej absloet ging veurwark wilt anstekken en zeker nich van dee zwoare pleerdinge of te scheeten. D’r dörv ok ging vuurweark an de man wörden bracht en iej dörvt ’t ook nich van oawer de greans vothalen. Wiej zollen doarmet vuurblieven dat d’r gin leu verletst zollen wörden en doarduur noar ’n kraankenhoes zollen mötten goan of arger noch, oet de tied zollen kommen.
D’r wörden oons ok vroagt of wiej gin dinge in de braand wollen stekken, de politiedeenders en de leu van de zeekenwage heur gang te loaten goan, woarduur ze heur wark good könt doon en de zake in de riege könt hoalden. En dat is allemoal neudig um zo rap möglik dat virus vot te jagen woarduur wiej, zo gezweend as ’t kan, wier op n’n rechtoo rechtan wieze met mekaar um kunt goan en oawer de vloor hen keunt kommen.

‘of ik oonder n’n steen heb daalleagen...’

Wat hef elkeen zik ordeantelik an de reagels hoalden. Gin oonvertoagen weurde of dinge bint d’r gebuurt. Of nich dan?

Wat zeg iej? Of ik oonder n’n steen heb daalleagen met de feestdage? Hoozoo dat dan? Hebt ieleu zeen dat d’r wel gin moondkäpkje wol gebroeken, heb ieleu ok heurt en zeen dat d’r wal degelik biej leu in ’t hoes meer as veer leu biej mekaar bint wes en doar good brekken en angoan bint?
Heb iej ok heurt dat d’r in grote ruumtes onmeuniog völleu biej mekaar bint kommen um zik oonwies te reuren en te tieren? Leupen ze oe ok biej ’n grootgrutter zowat kats van de been of um ’t een of aander oet ’t schap te griepen? Oh joa, is d’r veurweark ofstokken op oalderjoars-oavond met van dee oonwieze pleerdinge?
En ha’j saanderdaags ok n’n onwiezen pröttel op de stroat liggen? Hadden ze dat veurweark illegetiem eargens vot of van oawer de greans haalt? En bint d’r völ leu gewoond raakt en bint d’r zölfs verstöarven duur dat veurweark? Hebt ze ok auto’s in de braand stokken en heb d’r wat leu politiedeenders en boa’s ’t wearken onmeugelik maakt? Is d’r ok n’n zeekenauto in de braand stökken en hebt ze de leu dee doar biej heurt ’t weark onmöggelik maakt?

Verdomd en gineen, noe ai’j ’t zegt, wet ik ’t ok wier. Schaandelik dat d’r zo met de reagels wördt umgoan. Dat d’r leu bint dee zik an god noch gebod ok mear ietskes steurt.

As dat oonze moatschoppieje is wörden dan bin’t wiej n’n mooien eand hen.

Toch wunske ik oe ’n mooi 2022.

    Tinus Kroeds

Column Tinus Kroeds